Италия чемпионатида 26-тур баҳсларига старт берилди. Тур доирасида «Сассуоло» жамоаси мусобақа аутсайдери ҳисобланган «Верона» устидан йирик ҳисобда ғалаба қозонди. Мазкур учрашувда «нероверди» фахрийси Доменико Берарди ўз ҳисобига иккита гол ёздириб қўйди. Ушбу голлар эвазига у А Серия тарихидаги умумий тўпурарлар рўйхатида Андрей Шевченкони ортда қолдиришга муваффақ бўлди.
Айни пайтда Берарди ҳисобидаги голлар сони 128 тага етди, украиналик собиқ ҳужумчи ҳисобида эса 127 та гол мавжуд. Шу билан бирга, Берарди ушбу кўрсаткич бўйича афсонавий Жанни Ривера билан тенглашиб олди. Ҳар икки футболчи А Серия тарихидаги энг яхши тўпурарларнинг умумий рейтингида 47-ўринни эгаллаб турибди.
Қайд этилган ғалаба «Сассуоло» жамоасига турнир жадвалида саккизинчи поғонага кўтарилиб олиш имконини берди.
