Londonning «Arsenal» klubi a’zosi Noni Madueke jamoatchilikda uning xarakteri borasida noto‘g‘ri tasavvur shakllangan deb hisoblaydi.

«Ba’zan odamlar meni haddan tashqari mag‘rur, o‘ziga bino qo‘ygan yoki yetarlicha mehnat qilmaydi, deb o‘ylashadi. Aslida esa, ehtimol, barchasi buning aksidir. Men doimo o‘z mahoratimni oshirishga harakat qilaman. Odamlar mening o‘z ishimga haqiqatan ham juda jiddiy yondashishimni bilishlarini istardim», — deya Angliya ommaviy axborot vositalari 23 yoshli futbolchining so‘zlaridan iqtibos keltirmoqda.

Ma’lumot o‘rnida, Noni Madueke joriy mavsumda 26 ta uchrashuvda maydonga tushib, o‘z hisobiga oltita gol va uchta golli uzatmani yozdirib qo‘ydi. O‘tgan yilning iyul oyida «Arsenal» vingerni «Chelsi» klubidan 56 million yevro evaziga sotib olgan edi.