«Atalanta» klubi yarim himoyachisi Ederson yozgi transfer oynasi vaqtida Madridning «Atletiko» jamoasiga o‘tishi mumkin.

Insayder Nikolo Skiraning hisobotida qayd etilishicha, «matraschilar» braziliyalik futbolchi bilan shaxsiy shartnoma shartlari bo‘yicha kelishuvga erishgan. 26 yoshli xavbekning La Liga grandi bilan imzolaydigan shartnomasi 2031 yilga qadar mo‘ljallanishi ko‘zda tutilgan. Manbaga ko‘ra, uning yillik maoshi bonuslardan tashqari taxminan 4 million yevroni tashkil etadi.

Transfermarkt portali Edersonning transfer qiymatini 40 million yevroga baholamoqda. Futbolchining «Atalanta» bilan amaldagi shartnomasi 2027 yilning o‘rtalariga qadar davom etadi, shu sababli «Atletiko» endi Bergamo klubi bilan transfer qiymati bo‘yicha yakuniy kelishuvga erishishi lozim bo‘ladi.