Madridning «Real» klubi bosh murabbiyi bo‘lib ishlayotgan ispaniyalik mutaxassis Alvaro Arbeloa Chempionlar ligasi doirasida Lissabonning «Benfika» jamoasiga qarshi kechgan safar o‘yinidagi mojaroli vaziyat bo‘yicha o‘z fikrini bildirdi. Mazkur uchrashuvda «Real» hujumchisi Vinisius Junior gol urganidan so‘ng irqchilikka duch kelgan edi.
«Vini gol urdi va uni avval ham ko‘p marta qilganidek nishonladi. Uni provokator (fitnachi) deb atashga hech kimning haqqi yo‘q. Uning xatti-harakati irqchilik negizidagi haqoratlarga mutlaqo sabab bo‘la olmaydi. Agar u jamoaga maydonni tark etishni aytsa, biz buni albatta bajaramiz», — deya murabbiyning so‘zlarini Mundo Deportivo nashri keltirmoqda.
Eslatib o‘tamiz, «Benfika» va «Real» o‘rtasidagi uchrashuv «qaymoqranglilar»ning 1:0 hisobidagi minimal g‘alabasi bilan yakunlandi. Javob uchrashuvi kelasi hafta Madridda bo‘lib o‘tadi.
