Мадриднинг «Реал» клуби бош мураббийи бўлиб ишлаётган испаниялик мутахассис Альваро Арбелоа Чемпионлар лигаси доирасида Лиссабоннинг «Бенфика» жамоасига қарши кечган сафар ўйинидаги можароли вазият бўйича ўз фикрини билдирди. Мазкур учрашувда «Реал» ҳужумчиси Винисиус Жуниор гол урганидан сўнг ирқчиликка дуч келган эди.
«Вини гол урди ва уни аввал ҳам кўп марта қилганидек нишонлади. Уни провокатор (фитначи) деб аташга ҳеч кимнинг ҳаққи йўқ. Унинг хатти-ҳаракати ирқчилик негизидаги ҳақоратларга мутлақо сабаб бўла олмайди. Агар у жамоага майдонни тарк этишни айтса, биз буни албатта бажарамиз», — дея мураббийнинг сўзларини Mundo Deportivo нашри келтирмоқда.
Эслатиб ўтамиз, «Бенфика» ва «Реал» ўртасидаги учрашув «қаймоқранглилар»нинг 1:0 ҳисобидаги минимал ғалабаси билан якунланди. Жавоб учрашуви келаси ҳафта Мадридда бўлиб ўтади.
