"Bavariya" sport direktori Maks Eberl himoyachi Alfonso Devisning Bundesliga 23-turi doirasidagi "Ayntraxt"ga qarshi o‘yinda (3:2) olgan jarohati haqida ma’lumot berdi.
Kanadalik futbolchi uchrashuvning 50-daqiqasida maydonni tark etishga majbur bo‘lgan edi.
"Devis uzoq muddatga safdan chiqishi mumkinligiga o‘xshayapti. Katta ehtimol bilan bu mushak jarohati. U hozirda tibbiy ko‘rikdan o‘tmoqda", — deya Eberlning so‘zlarini keltirdi jurnalist Maksimilian Kox.
Ma’lumot uchun, Alfonso Devis 2019 yilda 14 million yevro evaziga "Vankuver"dan Myunxen klubiga o‘tgan edi. Uning amaldagi shartnomasi 2030 yilning 30 iyuniga qadar mo‘ljallangan. Joriy mavsumda futbolchi "Bavariya" safida 12 ta o‘yinda maydonga tushib, bitta golli uzatmani amalga oshirgan.
