"Бавария" спорт директори Макс Эберль ҳимоячи Альфонсо Дэвиснинг Бундеслига 23-тури доирасидаги "Айнтрахт"га қарши ўйинда (3:2) олган жароҳати ҳақида маълумот берди.
Канадалик футболчи учрашувнинг 50-дақиқасида майдонни тарк этишга мажбур бўлган эди.
"Дэвис узоқ муддатга сафдан чиқиши мумкинлигига ўхшаяпти. Катта эҳтимол билан бу мушак жароҳати. У ҳозирда тиббий кўрикдан ўтмоқда", — дея Эберлнинг сўзларини келтирди журналист Максимилиан Кох.
Маълумот учун, Альфонсо Дэвис 2019 йилда 14 миллион евро эвазига "Ванкувер"дан Мюнхен клубига ўтган эди. Унинг амалдаги шартномаси 2030 йилнинг 30 июнига қадар мўлжалланган. Жорий мавсумда футболчи "Бавария" сафида 12 та ўйинда майдонга тушиб, битта голли узатмани амалга оширган.
