Luchano Spallettining «Yuventus»dagi kelajagi so‘roq ostida qolmoqda. Shanba kuni turinliklar A Seriya doirasida «Komo»ga imkoniyatni boy berishdi (0:2) — bu jamoaning ketma-ket uchinchi mag‘lubiyati bo‘ldi. «Yuventus»ning g‘alabasiz seriyasi esa 5 ta o‘yinga yetdi.
"La Gazzetta dello Sport" nashrining xabariga ko‘ra, «Yuventus» rahbariyati Spallettining ishiga «Galatasaroy» va «Roma»ga qarshi o‘yinlardan so‘ng baho beradi. Bundan tashqari, klub bosh direktori Damyen Komollining kelajagi bo‘yicha ham qaror qabul qilinadi — yakuniy so‘zni klubga egalik qiluvchi "Exor" xoldingi bosh direktori Jon Elkann aytadi.
Qayd etilishicha, «Yuventus» keyingi mavsumda Chempionlar ligasiga yo‘llanma olishni maqsad qilgan. Bu klubning so‘nggi ikki mavsumda zarar ko‘rgan moliyaviy holatini tiklash uchun zarur. 26-turdan so‘ng «byankoneri» A Seriya jadvalida 5-o‘rinni egallab turibdi va bitta zaxira o‘yiniga ega bo‘lgan «Roma»dan bir ochko ortda qolmoqda.
