Лучано Спаллеттининг «Ювентус»даги келажаги сўроқ остида қолмоқда. Шанба куни туринликлар  А Серия доирасида «Комо»га имкониятни бой беришди (0:2) — бу жамоанинг кетма-кет учинчи мағлубияти бўлди. «Ювентус»нинг ғалабасиз серияси эса 5 та ўйинга етди.

"La Gazzetta dello Sport" нашрининг хабарига кўра, «Ювентус» раҳбарияти Спаллеттининг ишига «Галатасарой» ва «Рома»га қарши ўйинлардан сўнг баҳо беради. Бундан ташқари, клуб бош директори Дамьен Комоллининг келажаги бўйича ҳам қарор қабул қилинади — якуний сўзни клубга эгалик қилувчи "Exor" холдинги бош директори Жон Элканн айтади.

Қайд этилишича, «Ювентус» кейинги мавсумда Чемпионлар лигасига йўлланма олишни мақсад қилган. Бу клубнинг сўнгги икки мавсумда зарар кўрган молиявий ҳолатини тиклаш учун зарур. 26-турдан сўнг «бьянконери» А Серия жадвалида 5-ўринни эгаллаб турибди ва битта захира ўйинига эга бўлган «Рома»дан бир очко ортда қолмоқда.