Angliyalik sobiq futbolchi Jeymi Karrager «Tottenxem»ga qarshi derbida (4:1) Mikel Artetaning Viktor Dyokereshni asosiy tarkibda maydonga tushirish qaroriga munosabat bildirdi.
Hujumchi dubl qayd etib, bahs qahramonlaridan biriga aylandi. Bundan avval «Liverpul»ning sobiq himoyachisi shvesiyalik futbolchi «kanonirlar» asosiy tarkibida o‘ynashga loyiq emasligini bir necha bor ta’kidlagan edi.
«Artetaning mehnatini e’tirof etish kerak. Menga ular Dyokereshdan [asosiy tarkib o‘yinchisi sifatida] voz kechishlari kerakdek tuyulgandi, ammo murabbiy uni o‘yindan o‘yinga asosiy tarkibda tushirishda davom etdi. Buning uchun Arteta tahsinga loyiq. U futbolchiga ishonishda davom etdi va yakunda futbolchi bu ishonchni oqladi», — dedi Karrager Sky Sports efirida yakshanba kungi uchrashuv yakunlarini sarhisob qila turib.
Viktor Dyokeresh joriy mavsumda «Arsenal» safida 36 ta o‘yinda maydonga tushib, 15 ta gol urishga muvaffaq bo‘ldi.
