Англиялик собиқ футболчи Жейми Каррагер «Тоттенхэм»га қарши дербида (4:1) Микель Артетанинг Виктор Дьёкерешни асосий таркибда майдонга тушириш қарорига муносабат билдирди.

Ҳужумчи дубль қайд этиб, баҳс қаҳрамонларидан бирига айланди. Бундан аввал «Ливерпуль»нинг собиқ ҳимоячиси швециялик футболчи «канонирлар» асосий таркибида ўйнашга лойиқ эмаслигини бир неча бор таъкидлаган эди.

«Артетанинг меҳнатини эътироф этиш керак. Менга улар Дьёкерешдан [асосий таркиб ўйинчиси сифатида] воз кечишлари керакдек туюлганди, аммо мураббий уни ўйиндан ўйинга асосий таркибда туширишда давом этди. Бунинг учун Артета таҳсинга лойиқ. У футболчига ишонишда давом этди ва якунда футболчи бу ишончни оқлади», — деди Каррагер Sky Sports эфирида якшанба кунги учрашув якунларини сарҳисоб қила туриб.

Виктор Дьёкереш жорий мавсумда «Арсенал» сафида 36 та ўйинда майдонга тушиб, 15 та гол уришга муваффақ бўлди.