«Monako» hujumchisi Magnes Akliush katta ehtimol bilan 25 fevral kuni bo‘lib o‘tadigan Chempionlar ligasi pley-off bosqichi doirasidagi «Pari Sen-Jermen»ga qarshi javob uchrashuvida maydonga tusha oladi. Bu haqda «L’Équipe» nashri xabar bermoqda.
Avvalroq futbolchi sonidan jarohat olgan edi. Jarohat jiddiy bo‘lmasa-da, u Liga 1 doirasidagi «Lans»ga qarshi o‘yinni (3:2) o‘tkazib yuborishga majbur bo‘ldi. Yakshanba kuni esa hujumchi odatiy tartibda mashg‘ulot o‘tkazdi, bu uning parijliklarga qarshi bo‘lajak bahsda ishtirok etishi mumkinligidan dalolat beradi. Jamoalar o‘rtasidagi dastlabki o‘yin 3:2 hisobida «PSJ» foydasiga hal bo‘lgan edi.
Joriy klub mavsumida Akliush 32 ta o‘yinda maydonga tushib, o‘z hisobiga 4 ta gol va 6 ta golli uzatmani yozdirib qo‘ydi.
