«Inter» himoyachisi Manuel Akanji o‘tgan yozda nima sababdan «Manchester Siti»ni tark etishga qaror qilganini ochiqladi.

— Kutilmaganda «Manchester Siti»da olti nafar sog‘lom markaziy himoyachi paydo bo‘lib qoldi, vaholanki maydonga faqat ikki kishi tusha olardi. Mavsum boshida o‘yin amaliyotisiz qolganimdan so‘ng, agentim bilan birga variantlarni ko‘rib chiqa boshladim. Klublar ko‘pincha futbolchilardan sodiqlikni talab qilishadi, lekin o‘zlari har doim ham bunga amal qilishmaydi, — deya Akanjining so‘zlarini keltiradi Topskills Sports UK.

Akanji 2022 yildan 2025 yilgacha «Manchester Siti» sharafini himoya qilgan. Ayni damda 30 yoshli shveysariyalik futbolchi «Inter» safida ijara asosida to‘p tepmoqda. Mish-mishlarga ko‘ra, Milan klubi futbolchining transfer huquqini to‘liq sotib olish bo‘yicha qaror qabul qilib bo‘lgan.

«Neradzurrilar» tarkibida Akanji barcha turnirlarni hisobga olganda 33 ta o‘yinda maydonga tushib, 2 ta gol urishga muvaffaq bo‘ldi.