Meksikada narkokartel rahbarining o‘limidan so‘ng boshlangan qonli tartibsizliklar FIFAning jiddiy xavotiriga sabab bo‘ldi. Mamlakatdagi beqaror vaziyat tufayli nafaqat ichki chempionat o‘yinlari qoldirilmoqda, balki xalqaro turnirlar ham xavf ostida qolgan.

The Touchline nashrining xabar berishicha, FIFA mart oyi oxirida Meksikada o‘tishi rejalashtirilgan qit’alararo pley-off turniri mezbonligini o‘zgartirishni ko‘rib chiqmoqda. Mazkur mini-turnirda JCH—2026 ning so‘nggi ikki yo‘llanmasi uchun Iroq, Kongo DR, Yamayka, Surinam, Boliviya va Yangi Kaledoniya terma jamoalari o‘zaro bahs olib borishi kerak. Meksikaning sakkizta shtatida yo‘llarni to‘sish va harbiylarga hujum qilish holatlari davom etayotgani sababli, FIFA bu jamoalar xavfsizligini ta’minlash maqsadida o‘yinlarni boshqa davlatga ko‘chirishga majbur bo‘lishi mumkin.

Hozircha tartibsizliklar tufayli Meksika ichki chempionatining to‘rtta o‘yini, jumladan, “Keretaro” — “Xuares” hamda “Gvadalaxara” — “Amerika” jamoalari o‘rtasidagi bahslar to‘xtatilgan. Ayni paytda mamlakatning sakkizta shtatida yo‘llarni to‘sish, avtomobillarga o‘t qo‘yish va harbiylarga hujum qilish holatlari kuzatilmoqda.

Mazkur voqealar O‘zbekiston terma jamoasining rejalariga ham ta’sir qilishi mumkin. Kannavaro jamoasi o‘z tarixidagi ilk Jahon chempionati uchrashuvini 2026-yilning 17 iyun kuni aynan Meksika poytaxtidagi “Asteka” stadionida o‘tkazishi belgilangan. Hozircha turnir mezbonligi (AQSH, Kanada va Meksika) masalasida o‘zgarishlar yo‘q, biroq xalqaro tashkilotlar vaziyatni sinchkovlik bilan kuzatmoqda.