Professional boksning super o‘rta vazn toifasi vakili Bektemir Meliqo‘ziyev ganalik Sena Agbekoga qarshi o‘tkazilgan jangdan so‘ng O‘zbekistonga qaytib keldi.
29 yoshli bokschi 2026-yil yakuniga qadar jahon chempionlik jangida ishtirok etishini ma’lum qildi.
“Ko‘pchilik ko‘rdi, albatta, oson bo‘lmadi. Chempionlik jangi oldidan yaxshi raqib tanlangan edi. Ringda har qanday holat bo‘lishi mumkin. Birinchi raunddayoq raqib boshi bilan zarba berib yubordi, bu men uchun noqulaylik tug‘dirdi va tiklanish uchun 4-5 raund vaqt sarflashga to‘g‘ri keldi. Shukrki, yakunda chiroyli tarzda g‘alaba qozondim. Hozirda chempionlik jangi uchun birinchi raqamli da’vogar bo‘lib tasdiqlandim. Tez orada Resendis va Charlo jang o‘tkazadi. Mana shu jang g‘olibiga qarshi majburiy da’vogar sifatida ringga ko‘tarilishim aniq bo‘ldi. Nasib qilsa, 2026-yil kuzda bu jang tashkil etilishi mumkin. Chempionlikni qo‘lga kiritganimdan so‘ng, har qanday raqib bilan ringga chiqishga va kamarni himoya qilishga tayyorman”, dedi bokschi.
Meliqo‘ziyev AQSHning Las Vegas shahrida o‘tkazilgan bahsning yettinchi raundida raqibini texnik nokautga uchratib, o‘ziga tegishli bo‘lgan WBA qit’alararo chempionlik kamarini muvaffaqiyatli himoya qildi. Bu 29 yoshli sportchi uchun professional ringdagi 17-g‘alaba bo‘ldi.
