Профессионал бокснинг супер ўрта вазн тоифаси вакили Бектемир Мелиқўзиев ганалик Сена Агбекога қарши ўтказилган жангдан сўнг Ўзбекистонга қайтиб келди.

29 ёшли боксчи 2026-йил якунига қадар жаҳон чемпионлик жангида иштирок этишини маълум қилди.

“Кўпчилик кўрди, албатта, осон бўлмади. Чемпионлик жанги олдидан яхши рақиб танланган эди. Рингда ҳар қандай ҳолат бўлиши мумкин. Биринчи раунддаёқ рақиб боши билан зарба бериб юборди, бу мен учун ноқулайлик туғдирди ва тикланиш учун 4-5 раунд вақт сарфлашга тўғри келди. Шукрки, якунда чиройли тарзда ғалаба қозондим. Ҳозирда чемпионлик жанги учун биринчи рақамли даъвогар бўлиб тасдиқландим. Тез орада Ресендис ва Чарло жанг ўтказади. Мана шу жанг ғолибига қарши мажбурий даъвогар сифатида рингга кўтарилишим аниқ бўлди. Насиб қилса, 2026-йил кузда бу жанг ташкил этилиши мумкин. Чемпионликни қўлга киритганимдан сўнг, ҳар қандай рақиб билан рингга чиқишга ва камарни ҳимоя қилишга тайёрман”, деди боксчи.

Мелиқўзиев АҚШнинг Лас Вегас шаҳрида ўтказилган баҳснинг еттинчи раундида рақибини техник нокаутга учратиб, ўзига тегишли бўлган WBA қитъалараро чемпионлик камарини муваффақиятли ҳимоя қилди. Бу 29 ёшли спортчи учун профессионал рингдаги 17-ғалаба бўлди.