«Barselona»ning sobiq yulduzi Ronaldinyo futbol uchrashuvlarini boshidan oxirigacha tomosha qilishni yoqtirmaydi. Braziliyalik afsona o‘z pozisiyasini tushuntirib berdi. Ronaldinyoning so‘zlariga ko‘ra, bir yarim soatlik o‘yin — bu juda ko‘p.
«Menga futbol tomosha qilish yoqmaydi. Faqat eng sara vaziyatlarni ko‘rish men uchun qiziq. 90 daqiqa — bu haddan tashqari ko‘p. Agar bu final yoki derbi bo‘lmasa, tomosha qilmayman, menga bu yoqmaydi. Asabiylasha boshlayman. "Qanday qilib bu futbolchi bunday pas berishi mumkin?" deb o‘ylayman va jahlim chiqadi», — deya Ronaldinyoning so‘zlaridan iqtibos keltiradi Transfer News Live.
Eslatib o‘tamiz, Ronaldinyo 2005 yilda «Oltin to‘p» sohibi bo‘lgan. Yevropadagi faoliyati davomida braziliyalik futbolchi uchta mamlakatda — «PSJ», «Barselona» va «Milan» klublarida to‘p surgan.
