«Benfika» hujumchisi Janluka Prestianni Madriddagi mehmonxona yaqinida haqorat qilindi.
Chorshanba kuni Chempionlar ligasining 1/8 finaliga chiqish uchun kechadigan javob uchrashuvida «Benfika» «Santyago Bernabeu»da «Real» bilan to‘qnash keladi. Birinchi o‘yinda madridliklar 1:0 hisobida g‘alaba qozonishgan edi. O‘sha bahsning 2-bo‘limida Vinisius Prestiannini og‘zini futbolkasi bilan yopib, uni «maymun» deb haqorat qilganlikda ayblaganidan so‘ng o‘yin to‘xtatilgan edi.
Dushanba kuni UEFA Prestiannini yevrokuboklardagi o‘yinlardan vaqtincha chetlatdi. «Benfika» bu qaror ustidan shikoyat qildi va argentinalik futbolchi jamoa bilan birga Madridga uchib ketdi.
«Real» muxlislarining bir guruhi mashg‘ulotga yo‘l olayotgan «Benfika» futbolchilarini mehmonxona yaqinida kutib olishdi. Prestianni sha’niga esa «Itdan tarqagan!» kabi haqoratlar yog‘dirildi.













