«Бенфика» ҳужумчиси Жанлука Престианни Мадриддаги меҳмонхона яқинида ҳақорат қилинди.

Чоршанба куни Чемпионлар лигасининг 1/8 финалига чиқиш учун кечадиган жавоб учрашувида «Бенфика» «Сантьяго Бернабеу»да «Реал» билан тўқнаш келади. Биринчи ўйинда мадридликлар 1:0 ҳисобида ғалаба қозонишган эди. Ўша баҳснинг 2-бўлимида Винисиус Престианнини оғзини футболкаси билан ёпиб, уни «маймун» деб ҳақорат қилганликда айблаганидан сўнг ўйин тўхтатилган эди.

Душанба куни УЕФА Престианнини еврокубоклардаги ўйинлардан вақтинча четлатди. «Бенфика» бу қарор устидан шикоят қилди ва аргентиналик футболчи жамоа билан бирга Мадридга учиб кетди.

«Реал» мухлисларининг бир гуруҳи машғулотга йўл олаётган «Бенфика» футболчиларини меҳмонхона яқинида кутиб олишди. Престианни шаънига эса «Итдан тарқаган!» каби ҳақоратлар ёғдирилди.