Fransiya futbol federasiyasi (FFF) o‘zining «X» ijtimoiy tarmog‘idagi sahifasida «Chelsi» va «uchranglilar» himoyachisi Uesli Fofanaga nisbatan bildirilgan irqchilik haqoratlariga munosabat bildirdi. Futbolchi APL 27-turi doirasidagi «Byornli»ga (1:1) qarshi o‘yindan so‘ng ushbu hujumlarga duch kelgan edi.
«Bir necha kundirki, Uesli Fofana qabul qilib bo‘lmas irqchilik ifodalariga duch kelmoqda. FFF uni to‘liq qo‘llab-quvvatlashini bildiradi va ushbu uyatli hujumlarni keskin ravishda qoralaydi. Irqchilik — bu shunchaki fikr emas. Bu — jinoyatdir. Biz sportda nafratga toqat qila olmaymiz. Biz kiyadigan futbolka, u qaysi jamoaniki bo‘lishidan qat’i nazar, shunchaki klub yoki milliy terma jamoadan ko‘proq narsani anglatadi: u o‘zida hurmat, fidoyilik va hamjihatlik qadriyatlarini mujassam etadi. O‘yinchiga uning terisi rangi tufayli hujum qilish — bu ushbu qadriyatlarga hujum qilish demakdir. Maydon sport ehtirosi, faxr va birlik makoni bo‘lib qolishi shart», — deyiladi FFF xabarida.
