Франция футбол федерацияси (FFF) ўзининг «X» ижтимоий тармоғидаги саҳифасида «Челси» ва «учранглилар» ҳимоячиси Уэсли Фофанага нисбатан билдирилган ирқчилик ҳақоратларига муносабат билдирди. Футболчи АПЛ 27-тури доирасидаги «Бёрнли»га (1:1) қарши ўйиндан сўнг ушбу ҳужумларга дуч келган эди.
«Бир неча кундирки, Уэсли Фофана қабул қилиб бўлмас ирқчилик ифодаларига дуч келмоқда. FFF уни тўлиқ қўллаб-қувватлашини билдиради ва ушбу уятли ҳужумларни кескин равишда қоралайди. Ирқчилик — бу шунчаки фикр эмас. Бу — жиноятдир. Биз спортда нафратга тоқат қила олмаймиз. Биз киядиган футболка, у қайси жамоаники бўлишидан қатъи назар, шунчаки клуб ёки миллий терма жамоадан кўпроқ нарсани англатади: у ўзида ҳурмат, фидойилик ва ҳамжиҳатлик қадриятларини мужассам этади. Ўйинчига унинг териси ранги туфайли ҳужум қилиш — бу ушбу қадриятларга ҳужум қилиш демакдир. Майдон спорт эҳтироси, фахр ва бирлик макони бўлиб қолиши шарт», — дейилади FFF хабарида.
