«Barselona» klubi Texnik hakamlar qo‘mitasining (CTA) La Liga doirasidagi jamoalar o‘rtasidagi o‘yinda (1:2) «Jirona»ning g‘alaba goli borasidagi qaroriga munosabat bildirdi.
24-tur o‘yinining 86-daqiqasida Fran Beltran gol urishidan oldin, «Jirona» yarim himoyachisi Klaudio Echeverri to‘pni o‘ziga to‘g‘rilab olayotganda butsilarining tishi bilan «Barsa» himoyachisi Jyul Kundening oyog‘iga zarba bergan edi. Fransuz futbolchisi yiqildi, shundan so‘ng Echeverri to‘pni Xoel Rokaga uzatdi, u esa Beltranga golli pas berdi. Vaziyat VAR hakamlari tomonidan ko‘rib chiqildi, biroq bosh hakam Sesar Soto Grado monitor yoniga chaqirilmadi va gol inobatga olindi.
CTA Echeverrining harakatini qoida buzish deb tan oldi. Demak, VAR vaziyatga aralashishi va Beltranning goli bekor qilinishi kerak edi. Ushbu o‘yinda VAR uchun mas’ul bo‘lgan hakam David Galves Raskon keyingi ogohlantirishgacha o‘z vazifasidan chetlatildi.
«Barsa» ijtimoiy tarmoqlarda Kundega nisbatan ishlatilgan fol aks etgan kollajni joylashtirdi va postga shunday izoh qoldirdi: «Xatoni tan olish — bu katta qadam. Keyingi qadam — undan qochish».
