«Барселона» клуби Техник ҳакамлар қўмитасининг (CTA) Ла Лига доирасидаги жамоалар ўртасидаги ўйинда (1:2) «Жирона»нинг ғалаба голи борасидаги қарорига муносабат билдирди.
24-тур ўйинининг 86-дақиқасида Фран Бельтран гол уришидан олдин, «Жирона» ярим ҳимоячиси Клаудио Эчеверри тўпни ўзига тўғрилаб олаётганда бутсиларининг тиши билан «Барса» ҳимоячиси Жюль Кунденинг оёғига зарба берган эди. Француз футболчиси йиқилди, шундан сўнг Эчеверри тўпни Хоэль Рокага узатди, у эса Бельтранга голли пас берди. Вазият ВАР ҳакамлари томонидан кўриб чиқилди, бироқ бош ҳакам Сесар Сото Градо монитор ёнига чақирилмади ва гол инобатга олинди.
CTA Эчеверрининг ҳаракатини қоида бузиш деб тан олди. Демак, ВАР вазиятга аралашиши ва Бельтраннинг голи бекор қилиниши керак эди. Ушбу ўйинда ВАР учун масъул бўлган ҳакам Давид Гальвес Раскон кейинги огоҳлантиришгача ўз вазифасидан четлатилди.
«Барса» ижтимоий тармоқларда Кундега нисбатан ишлатилган фол акс этган коллажни жойлаштирди ва постга шундай изоҳ қолдирди: «Хатони тан олиш — бу катта қадам. Кейинги қадам — ундан қочиш».
