Yarim himoyachi Bernardu Silva, katta ehtimol bilan, joriy mavsum yakunidan so‘ng "Manchester Siti"ni tark etadi.
"Topskills Sports UK" nashri bergan ma’lumotlarga ko‘ra, "shaharliklar" portugaliyalik futbolchi bilan shartnomani uzaytirmaydilar, shu sababli yozda u erkin agentga aylanadi. 31 yoshli futbolchi bilan shartnoma imzolashga "Benfika" qiziqish bildirmoqda. "Burgutlar" xavbekning vakillari bilan uning qaytishi borasida muzokaralarni boshlab yuborishgan. Shuningdek, Bernardu Silva atrofidagi vaziyatni "Barselona", "PSJ", "Yuventus" va "Galatasaroy" klublari ham kuzatib bormoqda.
Bernardu Silva 2017 yilda "Monako"dan "Manchester Siti"ga 50 million yevro evaziga o‘tgan edi. Joriy mavsumda u "shaharliklar" safida barcha turnirlarda 36 ta o‘yinda maydonga tushib, ikkita gol urdi va beshta golli uzatmani amalga oshirdi. Bernardu Silva "Benfika" klubi tarbiyalanuvchisi hisoblanadi.













