"Roma"ning sobiq himoyachisi Kostas Manolas "Yuventus" jamoasi "Galatasaroy"ga mag‘lub bo‘lib, Chempionlar ligasini tark etganidan so‘ng turinliklarni masxara qildi.

Birinchi saralash o‘yinida 2:5 hisobida imkoniyatni boy bergan turinliklar javob uchrashuvida 3:2 hisobida g‘alaba qozonishganiga qaramay, musobaqaning 1/8 finaliga yo‘l ola bilishmadi.

Oradan bir necha soat o‘tgach, Manolas "Roma"ning 2018 yilda "Barselona"ga qarshi o‘tkazgan o‘yini suratlari aks etgan postni repost qildi va shunday deb yozdi: "Ba’zi qahramonliklar faqat gladiatorlargagina xos!"

Suratlarda rimliklar "Kamp Nou"dagi 1:4 hisobidagi mag‘lubiyatdan so‘ng o‘z uylarida "Barsa"ni 3:0 hisobida mag‘lub etgan Chempionlar ligasi o‘yini lavhalari aks etgan. O‘shanda Manolas javob o‘yinidagi gollardan biriga mualliflik qilgan va "Roma" musobaqaning o‘sha paytdagi eski qoidalariga ko‘ra yarim finalga yo‘l olgan edi.