"Рома"нинг собиқ ҳимоячиси Костас Манолас "Ювентус" жамоаси "Галатасарой"га мағлуб бўлиб, Чемпионлар лигасини тарк этганидан сўнг туринликларни масхара қилди.

Биринчи саралаш ўйинида 2:5 ҳисобида имкониятни бой берган туринликлар жавоб учрашувида 3:2 ҳисобида ғалаба қозонишганига қарамай, мусобақанинг 1/8 финалига йўл ола билишмади.

Орадан бир неча соат ўтгач, Манолас "Рома"нинг 2018 йилда "Барселона"га қарши ўтказган ўйини суратлари акс этган постни репост қилди ва шундай деб ёзди: "Баъзи қаҳрамонликлар фақат гладиаторларгагина хос!"

Суратларда римликлар "Камп Ноу"даги 1:4 ҳисобидаги мағлубиятдан сўнг ўз уйларида "Барса"ни 3:0 ҳисобида мағлуб этган Чемпионлар лигаси ўйини лавҳалари акс этган. Ўшанда Манолас жавоб ўйинидаги голлардан бирига муаллифлик қилган ва "Рома" мусобақанинг ўша пайтдаги эски қоидаларига кўра ярим финалга йўл олган эди.