«Santos» hujumchisi Neymar Braziliya Seriya A doirasida «Vasko da Gama»ga qarshi kechgan bahsda (2:1) dubl qayd etdi. Yulduz futbolchi uchrashuvning 25 va 61-daqiqalarida raqib darvozasini ishg‘ol qildi. O‘yindan so‘ng u jurnalistlarning Braziliya terma jamoasiga qaytish haqidagi savollariga javob berdi.

«O‘tgan haftada ular meni dunyodagi eng yomon futbolchi deb aytishayotgandi. Menimcha, o‘shanda bugungidan ko‘ra yaxshiroq o‘ynagandim, lekin bu safar ikkita gol urdim va bu hamma narsani hal qildi. Futbol shunaqa: bugun sen dunyoda eng yomonisan, jamoada senga joy yo‘q, sen allaqachon «pensiya»dasan, ertaga esa ikkita gol urasan va eng zo‘riga aylanasan. Seni jahon chempionatiga olib borish kerak bo‘ladi, sen — «o‘nlik»san.

Men bugungi kun bilan yashayman, o‘zimni mashg‘ulotlarga bag‘ishlayman va optimal formamni saqlashga harakat qilaman. Hozir o‘zimni yaxshi his qilyapman», — deya Neymarning so‘zlarini keltirmoqda The Touchline.

Yaqinda Karlo Anchelotti «Santos» forvardini Braziliya terma jamoasining mart oyidagi o‘yinlariga taklif qilmasligi haqida xabarlar tarqalgan edi.