Italiyaning «Milan» klubi so‘nggi vaqtlarda bir qator omadsizliklarga duch keldi. Ayniqsa, o‘z maydonida «Parma»dan qabul qilingan mag‘lubiyat (0:1) juda alamli bo‘ldi, chunki bu natija «rossonerilar»ning A Seriyadagi hayratlanarli 24 o‘yinlik mag‘lubiyatsiz seriyasiga nuqta qo‘ydi.
Hozirda jamoaning asosiy yulduzlaridan biri, xorvatiyalik afsonaviy yarim himoyachi Luka Modrich sheriklarini jipslashishga va qolgan 12 ta uchrashuvda bor kuchlarini ishga solishga chaqirdi.
«Albatta, bu biz istagan natija emas edi, lekin endi oldimizda 12 ta final turibdi», — deb yozdi 40 yoshli futbolchi o‘z ijtimoiy tarmoqlarida.
Eslatib o‘tamiz, Luka Modrich 2025 yilning yozida «Real Madrid» bilan xayrlashib, erkin agent sifatida «Milan» safiga kelib qo‘shilgan edi. Italiya chempionatining navbatdagi turida «Milan» jamoasi «Kremoneze»ga qarshi bahs olib boradi.
