Madridning "Atletiko" klubi sobiq hujumchisi Diyego Kosta o‘z faoliyatidagi eng yomon lahza deb qaysi voqeani hisoblashini aytib berdi.

Asli braziliyalik bo‘lgan ispaniyalik futbolchi 2014 yilgi Chempionlar ligasi finalini alohida qayd etdi. O‘shanda "matraschilar" Madridning "Real" klubiga 1:4 hisobida imkoniyatni boy bergan edilar. O‘sha o‘yinda "Atletiko" 93-daqiqagacha 1:0 hisobida oldinda borayotgandi, biroq g‘alabani saqlab qola olmadi va qo‘shimcha bo‘limlarda yana uchta gol o‘tkazib yubordi.

"O‘sha final — faoliyatimdagi eng yomon lahza. Hammasi qanday sodir bo‘lgani tufayli bu juda og‘riqli edi. Ammo bunday muvaffaqiyatsizliklardan ham ijobiy jihatlarni topish kerak. Biz Chempionlar ligasi finaligacha yetib bordik. Biz hozirgi zamon "Atletiko"sining muvaffaqiyatli tarixiga poydevor qo‘ydik", — dedi hujumchi Mario Suaresga bergan intervyusida.

37 yoshli Diyego Kosta hali rasman faoliyatini yakunlaganini e’lon qilmagan, biroq bir yildan ko‘proq vaqtdan beri klubsiz qolmoqda.