Bahorning ilk oqshomida "Arsenal" va "Chelsi" Premyer-liga doirasida to‘qnash kelishadi. "Kanonirlar" oxirgi marta "pensionerlar"ga 2021 yilning avgustida imkoniyatni boy berishgan edi. "Chelsi"ga qarshi o‘tkazilgan so‘nggi 10 ta o‘yinda "Arsenal" 7 ta g‘alaba va 3 ta durang qayd etgan.

Matbuot anjumanida Mikel Artetaga ushbu muvaffaqiyatli seriya haqida savol berildi.

"Hamma gap tayyorgarlikda. U maydonga g‘alabaga bo‘lgan ishonch bilan tushish uchun o‘ziga xos ishonch va to‘g‘ri emosional holat bag‘ishlaydi. Keyin esa shunchaki buni amalga oshirish kerak.

"Chelsi" bizga qarshi o‘yinlarda turlicha harakat qilgan. Ular o‘yin davomida ham yondashuvni o‘zgartira olishadi. Ularda bunga moslasha oladigan murabbiy va futbolchilar bor. Biz tayyor bo‘lamiz va ulardan yaxshiroq bo‘lishga harakat qilamiz. Ikki hafta yoki ikki yil oldin nima bo‘lgani endi muhim emas", — dedi Arteta.

"Arsenal" — "Chelsi" uchrashuvi 1 mart kuni Toshkent vaqti bilan 21:30da boshlanadi.