Professional boks olami o‘ta qiziqarli to‘qnashuvga tayyorgarlik ko‘rmoqda. Og‘ir vazn toifasida WBC, WBA va IBF kamarlari sohibi Aleksandr Usik (24-0, 15 KO) o‘zining navbatdagi jangi sanasini rasman e’lon qildi.
23 may kuni Misrning Giza shahrida ukrainalik bokschi dunyo kikboksingi afsonasi — niderlandiyalik Riko Verxovenga qarshi ringga ko‘tariladi. Jangda ukrainalik sportchiga tegishli bo‘lgan WBC yo‘nalishi bo‘yicha jahon chempionligi unvoni tikiladi. Jang vaqtida 39 yoshda bo‘ladigan Aleksandr uchun bu Daniel Dyubuani beshinchi raundda texnik nokaut bilan mag‘lub etganidan keyingi ilk to‘qnashuv bo‘ladi.
Raqib tanlovi muxlislar uchun haqiqiy kutilmagan sovg‘a bo‘ldi. Riko Verxoven — kikboksingning og‘ir vaznidagi haqiqiy afsonadir. Gollandiyalik sportchi o‘n yildan ortiq vaqt davomida "Glory" promoushenida hukmronlik qilib kelgan.
