"Tottenxem" bosh murabbiyi Igor Tudor o‘z futbolchilarini to‘psiz ko‘p yugurishga to‘g‘ri kelishi haqida ogohlantirdi.
Mavsumning qolgan qismida "Tottenxem" boshqaruvini o‘z qo‘liga olgan va "Arsenal"dan uchralgan 1:4 hisobidagi mag‘lubiyatga guvoh bo‘lgan Tudor, jamoada nafaqat ko‘plab jarohatlanganlar borligini, balki safdagi o‘yinchilarning ham sport formasi joyida emasligini aniqladi.
Hozirda Tudor buni tuzatishga harakat qilmoqda va uning ish uslublari ba’zi futbolchilarga yoqmasligi mumkinligini oldindan biladi.
"Men ularni to‘psiz tezkor yugurishlariga majbur qilyapman. Futbolchilarga to‘psiz yugurish hech qachon yoqmaydi, lekin biz mashg‘ulotlarga buni qo‘shdik. Hozir kimgadir nimadir yoqmasligi haqida haddan tashqari ko‘p o‘ylaydigan vaqt emas. Eng yaxshi tomoni shundaki, ular buni tushunishmoqda va bunday narsalarga ochiq ekanliklarini ko‘rsatishdi.
Qattiq mehnat qilish — yagona yo‘l. Va yugurish kerak. Maydonning uzunligi 100 yard — sizlarda "yard" deyiladimi? Yuz yard, bu juda uzun. Shuning uchun yugurishingiz kerak.
Menimcha, jismoniy holatimizni hayratlanarli deb bo‘lmaydi. Futbolchilar oxirgi vaqtlarda ko‘p o‘yin o‘tkazishdi. Ko‘pchilik o‘yinchilar safda bo‘lmagani sababli jamoaning jismoniy holati yomonlashdi. Biz o‘yin o‘tkazmayotgan vaqtimizdan dvigatelga yoqilg‘i quyish va u yaxshiroq ishlashini ta’minlash uchun foydalanishimiz kerak.
Ular charchashgan. Yuqori pressing qilish uchun esa a’lo formada bo‘lish lozim. Hamma formada bo‘lishi shart, chunki agar kimdir kerakli holatda bo‘lmasa, u kechika boshlaydi va bu muammoga aylanadi", — deya Tudorning so‘zlaridan iqtibos keltiradi "The Telegraph".
