"Тоттенхэм" бош мураббийи Игор Тудор ўз футболчиларини тўпсиз кўп югуришга тўғри келиши ҳақида огоҳлантирди.

Мавсумнинг қолган қисмида "Тоттенхэм" бошқарувини ўз қўлига олган ва "Арсенал"дан учралган 1:4 ҳисобидаги мағлубиятга гувоҳ бўлган Тудор, жамоада нафақат кўплаб жароҳатланганлар борлигини, балки сафдаги ўйинчиларнинг ҳам спорт формаси жойида эмаслигини аниқлади.

Ҳозирда Тудор буни тузатишга ҳаракат қилмоқда ва унинг иш услублари баъзи футболчиларга ёқмаслиги мумкинлигини олдиндан билади.

"Мен уларни тўпсиз тезкор югуришларига мажбур қиляпман. Футболчиларга тўпсиз югуриш ҳеч қачон ёқмайди, лекин биз машғулотларга буни қўшдик. Ҳозир кимгадир нимадир ёқмаслиги ҳақида ҳаддан ташқари кўп ўйлайдиган вақт эмас. Энг яхши томони шундаки, улар буни тушунишмоқда ва бундай нарсаларга очиқ эканликларини кўрсатишди.

Қаттиқ меҳнат қилиш — ягона йўл. Ва югуриш керак. Майдоннинг узунлиги 100 ярд — сизларда "ярд" дейиладими? Юз ярд, бу жуда узун. Шунинг учун югуришингиз керак.

Менимча, жисмоний ҳолатимизни ҳайратланарли деб бўлмайди. Футболчилар охирги вақтларда кўп ўйин ўтказишди. Кўпчилик ўйинчилар сафда бўлмагани сабабли жамоанинг жисмоний ҳолати ёмонлашди. Биз ўйин ўтказмаётган вақтимиздан двигателга ёқилғи қуйиш ва у яхшироқ ишлашини таъминлаш учун фойдаланишимиз керак.

Улар чарчашган. Юқори прессинг қилиш учун эса аъло формада бўлиш лозим. Ҳамма формада бўлиши шарт, чунки агар кимдир керакли ҳолатда бўлмаса, у кечика бошлайди ва бу муаммога айланади", — дея Тудорнинг сўзларидан иқтибос келтиради "The Telegraph".