Braziliya prezidenti Luis Inasio Lula da Silva o‘z mamlakati terma jamoasining 2026 yilgi Jahon chempionatidagi g‘alabasiga shubha qilmayotganini bildirdi.
«Men ushbu kubokni qo‘lga kiritishimizga to‘liq ishonaman. Men Karlo Anchelotti bilan gaplashdim va uning juda jiddiy, vazmin va aqlli inson ekanligini ko‘rdim. U faqat 100 foiz jismoniy holatda bo‘lgan futbolchilar maydonga tushishiga amin. Anchelotti hech kimni faqat nomi (mashhurligi) uchun jamoaga chaqirmaydi — faqat o‘ynayotgan, mashq qilayotgan va tayyor bo‘lganlar imkoniyatga ega bo‘ladi.
Qachonki murabbiy shunday jiddiy yondashsa, futbolchilar ham o‘z zimmalarida qanday mas’uliyat borligini anglab yetadilar», — dedi davlat rahbari Braziliyadagi Jahon kubogi turnesi (Trophy Tour) doirasidagi tadbirda.
Eslatib o‘tamiz, italiyalik mutaxassis Karlo Anchelotti 2025 yilning may oyida «Real Madrid»ni tark etib, Braziliya terma jamoasi boshqaruvini qo‘lga olgan edi. Ayni damda «selesao» turnir jadvalida o‘z o‘rnini tiklab, 2026 yilgi mundialning asosiy favoritlaridan biri bo‘lib turibdi.
