«Manchester Yunayted» jamoasida fevral oyi yakunlariga ko‘ra eng yaxshi futbolchi aniqlandi. Ushbu sovrin hujumchi Benyamin Sheshkoga nasib etdi.
Yakuniga yetayotgan oyda Sheshko «Manchester Yunayted»ning to‘rtta o‘yinida ishtirok etib, o‘z hisobiga uchta gol yozdirib qo‘ydi. Sloveniyalik forvard «Fulxem», «Vest Xem» va «Everton» jamoalari darvozasini ishg‘ol qildi.
Shuni ta’kidlash joizki, Sheshkoning «Vest Xem» darvozasiga kiritgan goli — o‘ng qanotdan uzatilgan to‘pni jarima maydonchasi ichida to‘xtatmasdan aniq yo‘llagan zarbasi — «Manchester Yunayted» muxlislari tomonidan fevral oyining eng chiroyli goli deb topildi. Ushbu gol «qizil iblislar»ni mag‘lubiyatdan qutqarib qolgan edi.
Bahorning ilk kunida «Manchester Yunayted» o‘z maydonida «Kristal Pelas» jamoasini qabul qiladi.
