«Манчестер Юнайтед» жамоасида февраль ойи якунларига кўра энг яхши футболчи аниқланди. Ушбу соврин ҳужумчи Беньямин Шешкога насиб этди.

Якунига етаётган ойда Шешко «Манчестер Юнайтед»нинг тўртта ўйинида иштирок этиб, ўз ҳисобига учта гол ёздириб қўйди. Словениялик форвард «Фулхэм», «Вест Хэм» ва «Эвертон» жамоалари дарвозасини ишғол қилди.

Шуни таъкидлаш жоизки, Шешконинг «Вест Хэм» дарвозасига киритган голи — ўнг қанотдан узатилган тўпни жарима майдончаси ичида тўхтатмасдан аниқ йўллаган зарбаси — «Манчестер Юнайтед» мухлислари томонидан февраль ойининг энг чиройли голи деб топилди. Ушбу гол «қизил иблислар»ни мағлубиятдан қутқариб қолган эди.

Баҳорнинг илк кунида «Манчестер Юнайтед» ўз майдонида «Кристал Пэлас» жамоасини қабул қилади.