Angliya chempionatida 28-tur o‘yinlari bo‘lib o‘tdi. Mamlakatning amaldagi chempioni sifatida ishtirok etayotgan «Liverpul» jamoasi «Vest Xem» ustidan 5:2 hisobida yirik g‘alabani qo‘lga kiritdi. Ushbu muvaffaqiyat uchun poydevor birinchi bo‘limdayoq qo‘yildi — o‘shanda «Liverpul» raqib darvozasiga javobsiz uchta to‘p kiritgan edi.

Eng qiziqarli jihati shundaki, ushbu uchta golning barchasi burchak to‘plari amalga oshirilgandan so‘ng raqib darvozasidan joy oldi. O‘yindan so‘ng sinchkov statistiklar ma’lum qilishicha, «Liverpul» Angliya Premyer-ligasi tarixida birinchi bo‘limning o‘zida burchak to‘plaridan uchta gol urgan atigi ikkinchi jamoaga aylandi.

Bunday natijani ilk bor 2016 yili «Manchester Yunayted» jamoasi qayd etgan edi. O‘shanda «qizil iblislar» «Lester»ga qarshi bahsda shunday muvaffaqiyatga erishgan. Taqdir hazili bilan o‘sha paytda aynan «Lester» mamlakat chempioni maqomida maydonga tushgan edi.