Англия чемпионатида 28-тур ўйинлари бўлиб ўтди. Мамлакатнинг амалдаги чемпиони сифатида иштирок этаётган «Ливерпуль» жамоаси «Вест Хэм» устидан 5:2 ҳисобида йирик ғалабани қўлга киритди. Ушбу муваффақият учун пойдевор биринчи бўлимдаёқ қўйилди — ўшанда «Ливерпуль» рақиб дарвозасига жавобсиз учта тўп киритган эди.

Энг қизиқарли жиҳати шундаки, ушбу учта голнинг барчаси бурчак тўплари амалга оширилгандан сўнг рақиб дарвозасидан жой олди. Ўйиндан сўнг синчков статистиклар маълум қилишича, «Ливерпуль» Англия Премьер-лигаси тарихида биринчи бўлимнинг ўзида бурчак тўпларидан учта гол урган атиги иккинчи жамоага айланди.

Бундай натижани илк бор 2016 йили «Манчестер Юнайтед» жамоаси қайд этган эди. Ўшанда «қизил иблислар» «Лестер»га қарши баҳсда шундай муваффақиятга эришган. Тақдир ҳазили билан ўша пайтда айнан «Лестер» мамлакат чемпиони мақомида майдонга тушган эди.