"Arsenal" bosh murabbiyi Mikel Arteta Angliya Premyer-ligasi (APL) doirasida "Chelsi" ustidan qozonilgan g‘alabaga izoh berdi.

Uchrashuv "kanonirlar"ning 2:1 hisobidagi g‘alabasi bilan yakunlandi. O‘yinning 70-daqiqasidan boshlab, Pedru Netu qizil kartochka olgach, "Chelsi" bir kishi kam bo‘lib o‘ynadi. Ta’kidlash joizki, uchrashuvdagi barcha uchta gol burchak to‘plaridan so‘ng kiritildi.

"Gol o‘tkazib yuborgan vaziyatimiz bizni xafa qildi, ammo ixtiyorimizda butun boshli ikkinchi bo‘lim bor edi. Raqib tarkibida 10 nafar futbolchi qolganida, biz to‘p nazoratini ancha yaxshiroq amalga oshirishimiz kerak edi.

Biz natijadan juda mamnunmiz, chunki oxirgi hafta davomida ikkita juda qiyin o‘yin o‘tkazganimizni bilardik. Jamoaning kayfiyati va oxirigacha kurashishga tayyorligidan ko‘nglim to‘ldi.

Mart oyida biz barcha musobaqalarda ishtirok etmoqdamiz va peshqadamlar qatoridamiz", — deya Artetaning so‘zlarini BBC nashri keltirmoqda.