"Chelsi" bosh murabbiyi Liam Rosenyor Angliya Premyer-ligasi (APL) doirasida safarda "Arsenal"dan qabul qilingan mag‘lubiyatga izoh berdi.

Uchrashuv "kanonirlar"ning 2:1 hisobidagi g‘alabasi bilan yakunlandi. O‘yinning 70-daqiqasidan boshlab, Pedru Netu qizil kartochka olgach, "Chelsi" bir kishi kam bo‘lib o‘yinni davom ettirdi. Ta’kidlash joizki, uchrashuvdagi barcha uchta gol burchak to‘plaridan so‘ng kiritildi.

"Men xafaman. Hafsalam pir bo‘ldi. Agar biz o‘yinimizga kirib borayotgan standart vaziyatlar bilan bog‘liq muammolarni va intizomdagi kamchiliklarni bartaraf etmasak, erishgan barcha yutuqlarimizga qaramay, ko‘zlangan natijaga erisha olmaymiz.

Bu biz hal qilishimiz kerak bo‘lgan masala. Diqqatni jamlash bilan bog‘liq muayyan muammolar bor va ularni yo‘qotishimiz zarur. Biz butun hafta davomida standart vaziyatlar ustida ishlagan edik, shu sababli murabbiy sifatida buni qabul qilish men uchun yanada qiyinroq", — deya Rosenyorning so‘zlarini BBC nashri keltirmoqda.