"Челси" бош мураббийи Лиам Росеньор Англия Премьер-лигаси (АПЛ) доирасида сафарда "Арсенал"дан қабул қилинган мағлубиятга изоҳ берди.
Учрашув "канонирлар"нинг 2:1 ҳисобидаги ғалабаси билан якунланди. Ўйиннинг 70-дақиқасидан бошлаб, Педру Нету қизил карточка олгач, "Челси" бир киши кам бўлиб ўйинни давом эттирди. Таъкидлаш жоизки, учрашувдаги барча учта гол бурчак тўпларидан сўнг киритилди.
"Мен хафаман. Ҳафсалам пир бўлди. Агар биз ўйинимизга кириб бораётган стандарт вазиятлар билан боғлиқ муаммоларни ва интизомдаги камчиликларни бартараф этмасак, эришган барча ютуқларимизга қарамай, кўзланган натижага эриша олмаймиз.
Бу биз ҳал қилишимиз керак бўлган масала. Диққатни жамлаш билан боғлиқ муайян муаммолар бор ва уларни йўқотишимиз зарур. Биз бутун ҳафта давомида стандарт вазиятлар устида ишлаган эдик, шу сабабли мураббий сифатида буни қабул қилиш мен учун янада қийинроқ", — дея Росеньорнинг сўзларини BBC нашри келтирмоқда.
