Germaniya terma jamoasi bosh murabbiyi Yulian Nagelsmann darvozabon Manuel Noyerning jamoaga qaytishi mavzusida o‘z fikrini bildirdi.
Ommaviy axborot vositalarida tez orada 40 yoshini qarshi oladigan "Bavariya" sardorini Germaniya milliy terma jamoasiga taklif etish mumkinligi haqidagi gap-so‘zlar hali ham davom etmoqda. Taxminlarga ko‘ra, faxriy posbon Jahon chempionati arafasida "Bundestim"ning darvoza chizig‘idagi muammosini hal qilishi mumkin edi.
"Men bu masala bo‘yicha o‘z pozisiyamni aniq bayon qilganman, Manuning o‘zi ham o‘z fikrini ochiq aytgan. U terma jamoadagi faoliyatini yakunladi. Menimcha, u hozir ham "Bavariya"da o‘z ishini a’lo darajada bajarmoqda, biroq bizda Baumann qiyofasida yana bir ajoyib darvozabon bor. Agar Oli xuddi shunday o‘yin namoyish etishda davom etsa, Jahon chempionatini yuqori darajada o‘tkazadi", — dedi Nagelsmann Kicker nashri bilan suhbatda.
Eslatib o‘tamiz, Manuel Noyer 2024 yilda Germaniya terma jamoasidan ketgan edi.
