Argentinalik hujumchi Lionel Messi Shimoliy Amerika oliy futbol ligasi (MLS) muntazam chempionati doirasida “Orlando”ga qarshi kechgan safar o‘yinida dubl qayd etdi. Gollardan birini Messi jarima zarbasi orqali kiritdi. Shu tariqa Messining jarimadan kiritgan gollari soni 70 taga yetdi.

“Sporstar” jurnalining xabar berishicha, ushbu ko‘rsatkich bo‘yicha u Braziliya terma jamoasi tarkibida uch karra Jahon chempioni bo‘lgan “futbol qiroli” Pele bilan tenglashib oldi. Hozirda har ikki hujumchi 2-o‘rinni bo‘lishib turibdi. Bu borada Braziliya terma jamoasining sobiq a’zosi Juninyo Pernambukano peshqadamlik qilmoqda — uning hisobida jarima zarbalaridan urilgan 77 ta gol bor.

MLS’ning amaldagi chempioni hisoblangan “Inter Mayami” joriy mavsumdagi ilk g‘alabasini qo‘lga kiritdi. Dastlabki o‘yinda jamoa safarda Son Hyon Min yetakchiligidagi “Los Anjeles”ga yirik hisobda (0:3) imkoniyatni boy bergan edi. “Orlando” esa mavsum startidan buyon ketma-ket ikkinchi mag‘lubiyatini qabul qilib oldi, bungacha klub o‘z maydonida “Nyu York Red Bullz”ga imkoniyatni boy bergan (1:2).

MLS 3-turi doirasida “Orlando” 7 mart kuni safarda “Nyu York Siti” bilan o‘ynaydi, “Inter Mayami” esa 8 mart kuni Vashington shahrida “Di-Si Yunayted” mehmoni bo‘ladi.

Ma’lumot uchun, Krishtianu Ronaldu hisobida jarima zarbalaridan urilgan 64 ta gol bor va uning jarimadan kiritgan so‘nggi goli 2024 yil avgust oyida “An-Nassr”ning “Al-Fayha” ustidan qozongan g‘alabasiga (4:1) to‘g‘ri keladi.