Аргентиналик ҳужумчи Лионель Месси Шимолий Америка олий футбол лигаси (MLS) мунтазам чемпионати доирасида “Орландо”га қарши кечган сафар ўйинида дубль қайд этди. Голлардан бирини Месси жарима зарбаси орқали киритди. Шу тариқа Мессининг жаримадан киритган голлари сони 70 тага етди.

“Спорцтар” журналининг хабар беришича, ушбу кўрсаткич бўйича у Бразилия терма жамоаси таркибида уч карра Жаҳон чемпиони бўлган “футбол қироли” Пеле билан тенглашиб олди. Ҳозирда ҳар икки ҳужумчи 2-ўринни бўлишиб турибди. Бу борада Бразилия терма жамоасининг собиқ аъзоси Жунинё Пернамбукано пешқадамлик қилмоқда — унинг ҳисобида жарима зарбаларидан урилган 77 та гол бор.

MLS’нинг амалдаги чемпиони ҳисобланган “Интер Майами” жорий мавсумдаги илк ғалабасини қўлга киритди. Дастлабки ўйинда жамоа сафарда Сон Ҳён Мин етакчилигидаги “Лос Анжелес”га йирик ҳисобда (0:3) имкониятни бой берган эди. “Орландо” эса мавсум стартидан буён кетма-кет иккинчи мағлубиятини қабул қилиб олди, бунгача клуб ўз майдонида “Нью Йорк Ред Буллз”га имкониятни бой берган (1:2).

MLS 3-тури доирасида “Орландо” 7 март куни сафарда “Нью Йорк Сити” билан ўйнайди, “Интер Майами” эса 8 март куни Вашингтон шаҳрида “Ди-Си Юнайтед” меҳмони бўлади.

Маълумот учун, Криштиану Роналду ҳисобида жарима зарбаларидан урилган 64 та гол бор ва унинг жаримадан киритган сўнгги голи 2024 йил август ойида “Ан-Насср”нинг “Ал-Файҳа” устидан қозонган ғалабасига (4:1) тўғри келади.