Madridning «Real» klubi hujumchi Kilian Mbappening salomatligi haqida rasmiy bayonot e’lon qildi.

«Klubimizning tibbiy xizmati nazorati ostida fransuz mutaxassislari tomonidan o‘tkazilgan tekshiruvdan so‘ng o‘yinchimiz Kilian Mbappega chap tizza bog‘lamlarining cho‘zilishi tashxisi qo‘yildi. Shuningdek, u konservativ davolanish kursini o‘tashi maqsadga muvofiq ekani tasdiqlandi. Uning holati doimiy nazorat ostida bo‘ladi», — deyiladi klubning rasmiy saytidagi bayonotda.

Avvalroq Mbappe tizzadagi jarohatni davolash jarayoni bo‘yicha klub shifokorlari ishidan norozi ekani haqida xabarlar tarqalgan edi. Vaziyatdan ranjigan hujumchi o‘tgan hafta klub ruxsati bilan Parijga borib, mahalliy mutaxassislar bilan maslahatlashdi. Shu sababli u "Benfika"ga qarshi Chempionlar ligasi pley-off bosqichi javob uchrashuvini o‘tkazib yuborgan.

Ayni paytdagi davolash rejasi jarrohlik amaliyotidan qochishga qaratilgan, chunki operasiya uni uzoq muddat maydondan chetda qoldirishi mumkin.

«Real» futbolchining maydonga qachon qaytishi haqida aniq muddatlarni ochiqlamayapti, biroq tiklanish jarayoni ijobiy kechayotganini ta’kidlamoqda. Nazariy jihatdan, u "Manchester Siti"ga qarshi Chempionlar ligasi 1/8 final bahsiga qadar safga qaytishi mumkin. Ammo 11 mart kuni “shaharliklar”ga qarshi birinchi o‘yinda ishtirok etishi hozircha so‘roq ostida.

Joriy mavsumda Mbappe «Real» safida barcha musobaqalarda 33 ta o‘yinda 38 ta gol urib, 6 ta golli uzatmani amalga oshirgan.