Мадриднинг «Реал» клуби ҳужумчи Килиан Мбаппенинг саломатлиги ҳақида расмий баёнот эълон қилди.

«Клубимизнинг тиббий хизмати назорати остида француз мутахассислари томонидан ўтказилган текширувдан сўнг ўйинчимиз Килиан Мбаппега чап тизза боғламларининг чўзилиши ташхиси қўйилди. Шунингдек, у консерватив даволаниш курсини ўташи мақсадга мувофиқ экани тасдиқланди. Унинг ҳолати доимий назорат остида бўлади», — дейилади клубнинг расмий сайтидаги баёнотда.

Аввалроқ Мбаппе тиззадаги жароҳатни даволаш жараёни бўйича клуб шифокорлари ишидан норози экани ҳақида хабарлар тарқалган эди. Вазиятдан ранжиган ҳужумчи ўтган ҳафта клуб рухсати билан Парижга бориб, маҳаллий мутахассислар билан маслаҳатлашди. Шу сабабли у "Бенфика"га қарши Чемпионлар лигаси плей-офф босқичи жавоб учрашувини ўтказиб юборган.

Айни пайтдаги даволаш режаси жарроҳлик амалиётидан қочишга қаратилган, чунки операция уни узоқ муддат майдондан четда қолдириши мумкин.

«Реал» футболчининг майдонга қачон қайтиши ҳақида аниқ муддатларни очиқламаяпти, бироқ тикланиш жараёни ижобий кечаётганини таъкидламоқда. Назарий жиҳатдан, у "Манчестер Сити"га қарши Чемпионлар лигаси 1/8 финал баҳсига қадар сафга қайтиши мумкин. Аммо 11 март куни “шаҳарликлар”га қарши биринчи ўйинда иштирок этиши ҳозирча сўроқ остида.

Жорий мавсумда Мбаппе «Реал» сафида барча мусобақаларда 33 та ўйинда 38 та гол уриб, 6 та голли узатмани амалга оширган.