«Real»ning uch nafar futbolchisi diskvalifikasiya sababli «Selta»ga qarshi o‘yinni o‘tkazib yuboradi.

Alvaro Arbeloa jamoasi La Liganing 26-turida «Santyago Bernabeu» stadionida «Xetafe»ga 0:1 hisobida imkoniyatni boy berdi.

O‘yinning 68-daqiqasida «Real» himoyachisi Din Xyoysen «Xetafe» hujumchisi Luis Vaskesga nisbatan ishlatilgan qo‘polligi uchun sariq kartochka oldi. Ikkinchi bo‘limga qo‘shib berilgan 3-daqiqada esa Mario Martinga nisbatan qo‘pollik ishlatgan Alvaro Karreras ogohlantirildi. «Qaymoqranglilar»ning har ikki futbolchisi La Liganing joriy mavsumidagi 5-sariq kartochkalarini olishdi va keyingi turdagi «Selta» bilan bo‘ladigan bahsni o‘tkazib yuborishadi.

Ikkinchi bo‘limga qo‘shib berilgan 5-daqiqada hakam Alexandro Munis «Real» hujumchisi Franko Mastantuonoga hakam bilan tortishgani uchun to‘g‘ridan-to‘g‘ri qizil kartochka ko‘rsatdi. Ta’kidlash joizki, agar argentinalik futbolchi bugungi o‘yinda sariq kartochka olganida ham, La Liganing keyingi uchrashuvini o‘tkazib yuborgan bo‘lardi.