«Реал»нинг уч нафар футболчиси дисквалификация сабабли «Сельта»га қарши ўйинни ўтказиб юборади.

Альваро Арбелоа жамоаси Ла Лиганинг 26-турида «Сантьяго Бернабеу» стадионида «Хетафе»га 0:1 ҳисобида имкониятни бой берди.

Ўйиннинг 68-дақиқасида «Реал» ҳимоячиси Дин Хёйсен «Хетафе» ҳужумчиси Луис Васкесга нисбатан ишлатилган қўполлиги учун сариқ карточка олди. Иккинчи бўлимга қўшиб берилган 3-дақиқада эса Марио Мартинга нисбатан қўполлик ишлатган Альваро Каррерас огоҳлантирилди. «Қаймоқранглилар»нинг ҳар икки футболчиси Ла Лиганинг жорий мавсумидаги 5-сариқ карточкаларини олишди ва кейинги турдаги «Сельта» билан бўладиган баҳсни ўтказиб юборишади.

Иккинчи бўлимга қўшиб берилган 5-дақиқада ҳакам Алехандро Муньис «Реал» ҳужумчиси Франко Мастантуонога ҳакам билан тортишгани учун тўғридан-тўғри қизил карточка кўрсатди. Таъкидлаш жоизки, агар аргентиналик футболчи бугунги ўйинда сариқ карточка олганида ҳам, Ла Лиганинг кейинги учрашувини ўтказиб юборган бўларди.