Argentinalik yarim himoyachi Franko Mastantuono Madridning «Real» klubi safidagi yaqin oradagi uchrashuvlarda ishtirok etmasligi mumkin. Bu haqda «AS» nashri jurnalistlari xabar bermoqda.

Manbaning ta’kidlashicha, futbolchi Ispaniya chempionatining 26-turi doirasida kechgan «Xetafe»ga qarshi uy uchrashuvida maydondan chetlatilgani sababli jazolanishi mumkin. Bosh hakam bilan bahslashgani uchun argentinalik iqtidor egasiga La Liganing ikki yoki uchta o‘yiniga diskvalifikasiya qilinish xavfi soya solmoqda.

Eslatib o‘tamiz, «qirollik klubi» o‘z maydonida kechgan bahsda kutilmaganda 0:1 hisobida «Xetafe»ga imkoniyatni boy bergan edi.

Joriy mavsumda Mastantuono Ispaniya chempionatida 16 ta uchrashuvda maydonga tushib, o‘z hisobiga bitta gol yozdirib qo‘ydi. Hozirda «Real» 60 ochko bilan turnir jadvalida ikkinchi o‘rinni egallab turibdi.