Madridning «Real» klubi ustozi Alvaro Arbeloa Ispaniya chempionati 26-turi doirasida «Xetafe»ga qarshi kechgan muvaffaqiyatsiz o‘yindan so‘ng o‘z fikrlarini bildirdi. Ushbu bahsda «qirollik klubi» 0:1 hisobida kichik mag‘lubiyatga uchradi.
«Natija uchun mas’uliyat bosh murabbiyning zimmasida. Men tanqidlarga tayyorman. Shogirdlarimni ayblamoqchi emasman, ular vaziyatni o‘nglashga harakat qilishdi. Menimcha, biz kamida bitta golga loyiq edik», — deya mutaxassisning so‘zlaridan iqtibos keltiradi «Marca» gazetasi.
Ushbu mag‘lubiyatdan so‘ng Madrid superklubi peshqadam «Barselona»dan to‘rt ochkoga ortda qolmoqda. La Liganing navbatdagi turida «qaymoqranglilar» safarda «Selta» bilan kuch sinashadilar. Uchrashuv 6 mart kuni bo‘lib o‘tadi.
